لما تبقى جوا بيتك ....... جوا وطنك
بس حاسس انك غريب
لما تحس ان كل الناس جوا الوطن
مش اهلك ...مش ناسك
مش مواطنين جوا الوطن
لما تسأل والسؤال يتردلك
بدون جواب
لما تبكى ...لما تصرخ
وتبقى شايف ملايين ف الوطن
بس ولا حد منهم شايفك
حاسك
وحيد ... بردان ...عطشان وجعان
حاسس انك .. بدون وطن
اوعى تبكى .. اوعى تستسلم للموت
كون المواطن والوطن
اوعى تصدق
ان اى وطن ف الكون
مهما يكون
لو وطنك اتخلى عنك
هيكون لك وطن
ممكن جدا
يرحب بيك
يفتح كل الابواب ليك
يديك اسمه
وتعيش فيه باشا ومعاليك
لكن
يعيش جواك حب الوطن
وتوصى ولادك ..
"بالله عليكم ..ادفنونى ف قلب الوطن"
اصل الوطن
مش ارض ..مش بيت ..مش حكومة
الوطن
اول نسمة هوا اتنفستها
اول نقطة مية شربتها
اول بسمة
اول دمعة
اول صرخة
اول نبضة
اول كلمة
اول خطوة
الوطن هو البداية
هو النهاية
انت الوطن
وعشان كده ..
مهما تبعد ... تتغرب
تفضل شايل جوا قلبك
صورة للوطن
شوق وحنين
لكل لحظة حلوة ف الوطن
وانا عن نفسى
نفسى اسافر
نفسى اشوف مليون وطن
نفسى اجرب انى اتغرب
علشان زى ما قالوا
كل اللى اتغربوا قبلينا
لما بنرجع لحضن وطنا
الروح تانى بترجع لينا
ف الغربة
ناكل ...نشرب
نتعلم ونعلم
لكن نفضل غُربا
يفضل الوطن الجديد
مش وطن
مش اب
مش ام
جار مجرد جار
مش خال ولا عم
نفضل رغم كل شئ
محتاجين للوطن
مشتاقين لرجوعنا
لقلب الوطن
ليست هناك تعليقات:
إرسال تعليق