الشقيان
هذه الكلمات عبرت بها عن رحيل اخى الغالى والذى تحين ذكراه بعد يومين
ارجو الدعاء له ولامى وابى وجميع موتى المسلمين جميعا ان شاء الله
اما الشقيان فهو اللقب الذى اطلقه عليه اصدقاؤه فى الماضى لانه كان يدرس ويعمل فى نفس الوقت لمساندة امى فى تربيتنا ... جزاه الله عنا خيرا وادخله فسيح جناته ان شاء الله .
الشقيان
هده الشقا
شال الهموم متنوعة ومتفرقة
آن الأوان يرتاح بقي
كفياه شقا
عاش السنين هم و شقا
عمره ما خد
لكن .. عطا
ادي الجميع
عمره ما كان أبدا يبيع
عاون الغريب
حب القريب
ويوم رحيله عن الحياة
فاتها سعيد
عمري ماهنسى بسمته
وهو رايح - باذن الله - جنته
ابوي واخوي وحشتنى
مات أبوي من زمان
وأمي بعده بزمان
بس عمري ماحسيت يا عمري
وانت جنبى يا أغلى حبايبي
أني يوم كنت يتيمة
كنت بعد الأب .. أب
كنت بعدالأم .. أم
احن خال واطيب عم
آن الأوان ترتاح بقي
كنت دايما تهدهد قلبي
وتبتسم
أطمنى
أنا أخوكى
أنا أخوكى بس أبوك
عارفة أيه يعني أبوك
يعني اللى أنت تعوذيه
هتلاقيه
أطلبيني .....
تحت أمرك هتلاقينى
آااااه يا ضى عيني
آن الأوان
بعد الشقا
ترتاح بقي
أسمك عطا
دمك أوه (O)
يعنى عطا
من يوم ميلادك
ليوم وفاتك
وأنت عطا
آن الأوان ترتاح بقي
تنسي الآلام
تنسي الشقا
أرتاح بقي
عمري ماهنسي بسمتك
وانت رايح - ان شاء الله - جنتك
ارتاح بقي
ليست هناك تعليقات:
إرسال تعليق